Ақын атындағы басылымның кезекті нөмірі «Болашақтың ошағында біз тұтатқан от жансын» деген Мұқағали Мақатаевтың өлеңдерімен ашылған. Журналда мемлекет және қоғам қайраткері болған Алтынбек Сәрсенбайұлының 60 жылдығына арналған материалдар топтамасы бар. Батық Мәжитұлының «Мұқағалимен мұңдасқан» Алтынбек туралы тоғауын, Жанболат Аупбайдың «Шейіт» деп аталатын эссесін, Бейбітжан Нұрасылдың «Зауласын ақ тұлпарың алға қарай» өлеңін, Алтынбек Сәрсенбайұлына қайраткерлік баға берген сарабдал пікірлерді оқисыздар.
Ұжымы 150 дана «Мұқағали» журналына жазылған Алматыдағы №172 мектеп-гимназиясының директоры Талғат Қазыбаевтың көлемді сұхбаты әсерлі ойлармен қызықтырады. Мұқағали мұрасын зерттеген Бағашар Тұрсынбайұлы ақиық ақынның «ХХII ғасырдың да сырласы» екеніне тоқталады. «Мұқағали» энциклопедиясынан алынған «Мұзбалақтың» да айтары мол. Ақын Ерлан Жүніс «Мұқағали терезесін» оқырманға айқара ашып, жаңаша сыр шертеді.
Ақын Кәдірбек Құныпияұлының өлеңдері өмір суреттерін алға тартады. Шежіреші Жәлел Айдарханұлының «Шалкөде» туралы мақаласы терең танымға құрылған. Әбдіке Асанов пен Күлімхан Тараншықызының Мұқағалиға қатысты естеліктері ешкімді бейжай қалдырмайды. Алмагүл Жұмағұлова жазған «Бір жәдігердің сыры» сахна шебері, Қарасаздың түлегі Гүлшат Қыпшақоваға арналады. Нұртан Төлепбергенұлының «Мәскеудің дәмі бұйырмады» естелігі өткен күннің сағынышты сәттерімен қауыштырады. Жазушы Серік Сарыбайдың «Құлжа сақа» атты әңгімесі көңілге түрлі ой салатын шығарма.
